बेलोरा विमानतळावर प्रशिक्षण विमानाचे आगमन

 * मुख्यमंत्री फडणवीसांचे दूरदर्शी नेतृत्व
* दरवर्षी 180 पायलट होणार तयार

अमरावती /12 डिसेंबर : बेलोरा (अमरावती) विमानतळावर शुक्रवार, 12 डिसेंबर रोजी एक ऐतिहासिक क्षणाची नोंद झाली. एअर इंडियाच्या फ्लाइट ट्रेनिंग ऑर्गनायझेशन (एफटीओ)च्या दोन अत्याधुनिक डायमंड डीए-42 मल्टी-इंजिन प्रशिक्षण विमानांचे पहिले यशस्वी लँडिंग येथे झाले. यामुळे विदर्भातील विमानचालन व उड्डाण प्रशिक्षण क्षेत्रात महत्वाचे दालन खुले झाले आहे. या प्रसंगी विमानतळावर अधिकारी, प्रशिक्षक, स्थानिक नागरिक आणि माध्यम प्रतिनिधी उपस्थित होते आणि या ऐतिहासिक क्षणाचे कौतुक करत होते. अमरावतीत सुरू होणारी विमान उड्डाण प्रशिक्षण संस्था दक्षिण आशियातील सर्वात मोठी वैमानिक प्रशिक्षण संस्था ठरणार आहे. एमएडीसी आणि एअर इंडियाने पुढील 30 वर्षांसाठी या संस्थेचे व्यवस्थापन करण्याचा करार केला आहे. येथे दरवर्षी सुमारे 180 व्यावसायिक पायलट तयार केले जातील आणि एकूण 34 प्रशिक्षण विमानांचा ताफा या केंद्रावर उपलब्ध राहणार आहे.
मुख्यमंत्री देवेंद्र फडणवीस यांच्या दूरदर्शी नेतृत्वाखाली आणि सातत्यपूर्ण प्रोत्साहनामुळे हे यश साध्य झाले आहे. त्यांच्या मार्गदर्शनामुळे राज्यातील विमानचालन पायाभूत सुविधा वेगाने विकसित होऊ शकल्या आहेत. विमान वाहतूक आणि उड्डाण प्रशिक्षण क्षेत्राला मजबुती देण्याच्या त्यांच्या अटूट प्रयत्नांमुळे ही महत्वाची कामगिरी साध्य झाली, असे एफटीओने सांगितले. एमएडीसीच्या उपाध्यक्ष आणि व्यवस्थापकीय संचालक स्वाती पांडे यांनी या यशामागील महत्त्वाचे धोरणात्मक नेतृत्व केले. त्यांनी विमानतळाच्या विकासासाठी सातत्यपूर्ण मार्गदर्शन केले आणि या यशस्वी आगमनामुळे अमरावती विमानतळ विदर्भात संरचित उड्डाण प्रशिक्षण आणि विमानचालन प्रगतीसाठी उदयोन्मुख केंद्र म्हणून स्थापन होत आहे. एफटीओच्या प्रशिक्षण केंद्रासाठी 10 एकर क्षेत्रात अत्याधुनिक कॅम्पस उभारण्यात आला आहे. यात डिजिटल क्लासरूम, जागतिक दर्जाचे वसतीगृह, डिजिटाईज्ड ऑपरेशन्स सेंटर, स्वतःची विमान देखभाल युनिट आणि इतर तांत्रिक सुविधा समाविष्ट आहेत. या सुविधांमुळे प्रशिक्षणार्थ्यांना प्रत्यक्ष धडे देणे, विमान तपासणी, सुरक्षित उड्डाण प्रशिक्षण आणि व्यावसायिक कौशल्ये विकसित करणे शक्य होणार आहे.या प्रकल्पामुळे विमान वाहतूक क्षेत्रात आणि संलग्न उद्योगांमध्ये 3 हजारांहून अधिक नवीन रोजगाराच्या संधी निर्माण होण्याची अपेक्षा आहे. स्थानिक युवकांसाठी विमानचालनातील करिअर खुला होईल, तर विमान सेवा, देखभाल आणि तांत्रिक कामांमध्येही मोठ्या प्रमाणावर रोजगार उपलब्ध होतील.एफटीओच्या मते, अमरावती विमानतळावर केलेले हे पाऊल राज्याच्या विमान वाहतूक क्षमतावृद्धीचे द्योतक आहे. हे केंद्र केवळ प्रशिक्षणापुरते मर्यादित न राहता, संपूर्ण विमान वाहतूक आणि सेवाक्षमता क्षेत्राला नवी दिशा देणारे ठरणार आहे. भविष्यात येथे आणखी प्रशिक्षण विमान, अतिरिक्त प्रशिक्षक, नवीन तांत्रिक सुविधा आणि व्यावसायिक प्रशिक्षण केंद्र उभारण्यात येणार आहेत. या उपक्रमामुळे राज्यातील विमानचालन क्षेत्र अधिक सक्षम, आधुनिक आणि जागतिक दर्जाचे बनण्याच्या दिशेने महत्त्वपूर्ण पायरी उभी राहणार आहे.विदर्भातील विमान प्रशिक्षण आणि वाहतूक क्षेत्रात अमरावती विमानतळाच्या या यशस्वी पावलामुळे नवी दिशा ठरली असून, भविष्यातील पायलट आणि विमानचालकांना देशभरात रोजगाराच्या आणि व्यावसायिक संधींचा विस्तार होण्याची संधी निर्माण झाली आहे.